Чăваш Республикин вĕренӳ министерстви Чăваш Республикин вĕренӳ институчĕпе пĕрле чăваш халăх пултарулăхĕ урлă шкул ачисен чăваш чĕлхипе культурине вĕренес туртăмне сыхласа хăварса аталантарас, талантлă ачасене тупса палăртас, вĕсен пултарулăх хевтине пурнăҫлама майсем туса парас, вĕренекенсене наци культурине, тăван халăх йăли-йĕркине, унăн ăс-хакăлпа кăмăл-сипет хаклăхĕсене хăнăхтарас тĕллевпе 2025 çулта темиçе фестиваль-конкурс ирттерет. Вĕсенчен çаксене палăртса хăвармалла:
- Кăрлач (январь) уйăхĕн 22-мĕшĕнче 1–4-мĕш классенче вĕренекен ачасен «Туслăх хĕлхемĕ» республика фестивалĕ пуçланнă. Муниципалитет тапхăрне округ администрацийĕсен пуш (март) уйăхĕн 18‑мĕшĕччен йĕркелесе ирттермелле. Фестиваль номинацийĕсем анлă. Ачасем «Сăмах илемĕ», «Чăваш вăййи», «Янра, чăваш юрри» тата «Чăваш ташши» конкурссенче вăй виçме, пултарулăхне кăтартма пултараççĕ. Çĕнтерӳçĕсем республика шайĕнчи тапхăра хутшăнаççĕ.
- 5–6 классенче вĕренекенсен «Упрар тăван чĕлхемĕре» оратор ăсталăхĕн республика конкурсĕ кăрлач (январь) уйăхĕн 22‑мĕшĕнче пуçланнă. Кăçал ăна Раççейри Тăван çĕр-шыв хӳтĕлевçин çулталăкне тата Чăваш Енри Çĕнтерӳпе патриотлăх çулталăкне халалланă. Округ администрацийĕсен Конкурсăн муниципалитет шайĕнчи çĕнтерӳçисене нарăс (февраль) уйăхĕн 18-мĕшĕччен палăртмалла. 5-мĕш тата 6-мĕш классенче вĕренекенсем хăйсен ӳсĕмĕнчи икĕ ушкăна пайланаççĕ. Вĕсем çак темăсене ирĕккĕн суйласа илме, пултарулăхне кăтартма пултараççĕ: «Мухтав сана, Тăван çĕр-шыв хӳтелевçи!», «Тăван çĕр-шыва хӳтĕлекенсем – Раççейĕн шанчăклă ывăлĕсем!», «Ман пуласлăхăм – Тăван çĕр-шыв тăнăçлăхĕнче». Çĕнтерӳçĕсем республика шайĕнчи тапхăрта тупăшаççĕ.
- Шкулчченхи вĕренӳ заведенийĕсене çӳрекенсем те хăйсен пултарулăхне кăтартма пултараççĕ. Вĕсем валли «Хунав» республика фестивалĕ йĕркеленĕ. Вăл та икĕ тапхăрта иртет. Муниципалитет тапхăрĕ кăрлач (январь) уйăхĕн 22-мĕшĕнче пуçланнă, ака (апрель) уйăхĕн 2‑мĕшĕччен пырать. Çамрăк артистсем çак номинацисенче тупăшаççĕ: «Илемлĕ чăваш юрри», «Асамлă юмах тĕнчи» тата «Янра, сăввăм, хыттăнрах».
Пурне те конкурссемпе фестивальсене хутшăнма йыхравлатпăр, ăнăçу сунатпăр!
Йĕркелӳ комитечĕпе çыхăнмалли мелсем:
Телефон: 8(8352)58-45-22, хушма номер 143 – Чăваш Республикин вĕренӳ институчĕн регион аталанăвĕн центрĕ
e-mail: chrio18@rchuv.ru; chrio4@rchuv.ru